Rachel Cuschieri ingħaqdet mat-tim tan-nisa RSC Anderlecht Dames ’71 li jilgħab fis-Super League Belġjan. Cuschieri, li kienet l-ewwel mara Maltija fl-2014 li bdiet tilgħab il-futbol professjonalment (mat-tim Ciprijott Limassol FC Ladies), iffirmat kuntratt ta’ sena mat-tim Brussellin u bdiet it-taħriġ tagħha fil-Belġju dax-xahar.
Il-Ministru tal-Affarijiet Barranin Carmelo Abela irrappreżenta lil Malta fil-kommemorazzjoni tal-mitt sena tat-Tielet Battalja ta’ Ieper (Ypres) magħrufa wkoll bħala l-Battalja ta’ Passchendaele.
Il-Ministru kien akkumpanjat mill-ambaxxatur ta’ Malta għall-Belġju Ray Azzopardi, f’cerimonja li għaliha attendew numru ta’ personalitajiet barranin fosthom id-Duka u d-Dukessa ta’ Cambridge, ir-Re u r-Reġina tal-Belġju u bosta ufficjali għolja ta’ pajjiżi li ħadu sehem fil-battalja inkluż il-Ministru tal-Affarijiet Barranin Ġermaniż.
Ic-cerimonja saret f’Tyne Cot Cemetery fejn, fost l-oħrajn, hemm midfun Andrew Camilleri, Malti li ħa sehem fil-battalja mal-infanterija Awstraljana. Camilleri miet ta’ 26 sena f’Ottubru 1917.
Fuq mistoqsija tal-Onor. Clyde Puli, il-Ministru għall-Affarijiet Ewropej u l-Ugwaljanza tat cifri dwar in-numru ta’ Maltin li jaħdmu mal-UE. In-numru ta’ Maltin li jaħdmu mal-istituzzjoni tal-UE u korpi konsultattivi huwa ta’ 378 (żieda fuq it-365 fl-2013 u 324 fl-2010). Minn dawn 291 huma permanenti. Fejn jidħlu aġenziji tal-UE, dawn jimpjegaw 45 Malti (żieda fuq it-33 fl-2013), li wieħed minnhom biss huwa permanenti.
Il-partiti politici li se jikkontestaw l-elezzjoni ġenerali lkoll għamlu wegħdiet dwar il-possibbiltà ta’ postijiet ta’ votazzjoni barra minn Malta.
Il-Partit Laburista fil-Gvern qed iwiegħed hekk:
Nagħtu l-opportunità għall-persuni Maltin li jgħixu barra u li għandhom d-dritt tal-vot, li jivvutaw f’ambaxxati li għandna f’pajjiżi barranin.
Il-Partit Nazzjonalista u l-Partit Demokratiku qalu hekk:
Nagħtu liċ-ċittadini Maltin li jgħixu f’pajjiżi oħra Ewropej id-dritt li jivvutaw fl-elezzjonijiet ġenerali f’Malta permezz ta’ sistema ta’ distance voting.
L-Alternattiva Demokratika ukoll ipproponiet il-votazzjoni minn barra. Bħala parti minn numru ta’ riformi kostituzzjonali u demokratici huma pproponew:
l-użu tal-ambaxxati ta’ Malta biex Maltin bi dritt tal-vot ikunu jistgħu jivvutaw barra minn Malta minflok joqgħodu jinżlu Malta. Il-Maltin li jgħixu barra, li jkunu irreġistraw mar-rappreżentanzi diplomatiċi Maltin barra, ikunu jistgħu jivvotaw fl-eqreb ambaxxata jew konsolat.
Il-Kummissjoni Elettorali għadha kemm ħabbret li l-ġurament li jrid jittieħed għall-votazzjoni kmieni fis-27 ta’ Mejju u li jrid jittieħed sa nofsinhar il-Ġimgħa, 26 ta’ Mejju issa jista’ jittieħed minn ambaxxata jew kummissjoni għolja.
L-istqarrija tal-Kummissjoni tinkludi wkoll lista ta’ kummissarji tal-ġuramenti li jistgħu jagħtu l-ġurament bl-email tagħhom ħalli jkunu jistgħu jiġu kkuntattjati għal appuntament. Fost l-oħrajn, il-lista tinkludi l-ambaxxata Maltija fi Brussell.
Għall-elezzjoni ġenerali tat-3 ta’ Ġunju l-Gvern ħabbar titjiriet specjali issussidjati għal dawk li se jkunu barra minn Malta fi żmien l-elezzjoni. L-istqarrija ufficjali tgħid hekk:
[…] Air Malta plc se tipprovdi biljett bir-ritorn fuq servizzi skedati regolari tagħha b’noll ta’ €90 – inklużi t-taxxi u spejjeż oħra – għal persuni li huma eliġibbli biex jivvutaw f’Malta fl-elezzjoni ġenerali li jmiss. Il-bookings jistgħu jsiru fil-call centre tal-Air Malta fuq in-numru speċifiku (+356) 25 99 1230. Iċ-ċentru se jkun miftuħ bejn it-Tnejn u s-Sibt mit-8:00am-09:00pm, u l-Ħadd mit-8:00am-05:00pm mill-Ħamis 4 ta’ Mejju 2017 fit-08:00 ta’ filgħodu.L-ivvjaġġar lejn Malta hu possibbli mill-24 ta’ Mejju 2017 sat-3 ta’ Ġunju 2017, u r-ritorn mit-3 ta’ Ġunju, 2017 sas-7 ta’ Ġunju 2017. Dawk il-persuni li jagħżlu li jivvutaw kmieni fis-27 ta’ Mejju 2017 jistgħu jivvjaġġaw lejn Malta mis-24 sas-26 ta’ Mejju biex ikunu jistgħu japplikaw l-Uffiċċju Elettorali, Evans Building, il-Belt Valletta, sa mhux aktar tard minn 12:00pm tas-26 ta’ Mejju 2017. Huma jistgħu jivvjaġġaw lura mis-27 ta’ Mejju 2017, iżda mhux aktar tard mis-7 ta’ Ġunju 2017.Dawn l-arranġamenti tal-ivvjaġġar huma disponibbli għal:(a) votanti eliġibbli, inklużi dawk miżżewġa lil barranin, dawk li jistudjaw, li jaħdmu, jew li għaddejjin minn trattament mediku barra mill-pajjiż; u(b) dipendenti tal-persuni msemmija f’(a) hawn fuq.Dawk il-persuni li tapplika għalihom din id-direttiva huma votanti li isimhom jidher fir-Reġistru Elettorali ppubblikat fi żmien ħamest ijiem mill-pubblikazzjoni tar-writ tal-Elezzjoni Ġenerali.
Għall-elezzjoni ġenerali li se ssir is-Sibt, 3 ta’ Ġunju l-postijiet tal-votazzjoni se jkunu miftuħa mis-7 a.m. sal-10 p.m.
Il-process elettorali huwa fil-bicca l-kbira l-istess bħal dak tal-aħħar elezzjoni. Dan ifisser li se jkun hemm il-possibiltà ta’ votazzjoni kmieni imma mhux votazzjoni minn ambaxxata, b’mandat, bil-posta jew bl-e- jew i-voting.
Biex wieħed jivvota jrid ikollu dokument tal-vot u, biex tkun intitolat għal dan id-dokument, ismek irid jidher fl-aħħar Reġistru Elettorali.
Id-dokument tal-vot jitwassal lill-elettur fl-indirizz irreġistrat f’Malta u jista’ jitħalla jew mal-elettur inniffsu jew ma’ persuna adulta li toqgħod fl-istess indirizz. Jekk id-dokument ma jitwassalx għax ħadd ma jkun id-dar fil-ħin li jitqassam, trid tiġbor id-dokument personalment mill-ufficcji tal-Kummissjoni Elettorali sal-11.59 p.m. tal-Ħamis, 1 ta’ Ġunju.
Jekk fit-3 ta’ Ġunju tkun imsiefer tista’ tivvota kmieni. Il-votazzjoni kmieni issir is-Sibt ta’ qabel jum l-elezzjoni u allura fis-27 ta’ Mejju. Biex tivvota kmieni trid tieħu ġurament mal-Kummissjoni Elettorali sal-jum ta’ qabel (allura, il-Ġimgħa, 26 ta’ Mejju) f’nofsinhar. Votazzjoni kmieni imgħoddija saru fil-Kumpless tal-Għadd tal-Voti (ex-Trade Fair), in-Naxxar.
