Ir-rapport tal-2022 tal-Kunsill għall-Maltin li jgħixu barra minn Malta tqiegħed fuq il-mejda tal-Kamra tad-Deputati ta’ Malta. Fost il-punti li issemmew kien hemm dik ta’ votazzjoni minn barra għall-elezzjoni Ewropea is-sena d-dieħla.
Archives
All posts by Franklin Mamo
Qed issir sejħa lil min jipprattika xi artiġjanat Malti u li jixtieq ikun inkluż fir-Reġistru tal-Artiġjani u Intraprendituri. Dan ir-Reġistrju huwa miżmum mill-Uffiċċju tar-Reġistratur tal-Artiġjanat, Artiġjani u Intraprendituri tas-Snajja li xogħolu hu, fost l-oħrajn, li jagħmel kuntatt ma’ u jżomm kompendju ta’ Maltin li jgħixu barra u li jipprattikaw l-artiġjanat tradizzjonali Malti, sew bħala passatemp, sew għal skopijiet kummerċjali. Dan l-eżerċizzju qed isir bil-għan li jinżamm rekord ta’ dan l-artiġjanat u l-metodi ta’ produzzjoni biex iservu ta’ referenza għall-ġenerazzjonijiet futuri.
Hemm il-ħsieb li l-informazzjoni tkun disponibbli fuq il-portal tal-artiġjanat. Fil-ġejjieni, dawn l-artiġjani jistgħu jiġu mistiedna jipparteċipaw f’attivitajiet maħsuba biex jippromwovu xogħlijiet artiġjanali Maltin.
Minn hu interessat huwa mitlub jimla l-formola u jibgħatha fuq craftsregister@gov.mt.
L-Ambaxxata Maltija għall-Belġju se torganizza lejla letterarja mal-awtur u poeta Immanuel Mifsud il-Ġimgħa, 3 ta’ Frar, mis-6 p.m. sas-7 p.m. f’Dar Malta (Rue Archimède 25, Brussell).
Mifsud huwa rebbieħ ta’ bosta premji nazzjonali u internazzjonali u x-xogħlijiet tiegħu ġew tradotti fi ħdax-il lingwa. Għandu dottorat fil-letteratura u jgħallem il-letteratura kontemporanja Maltija u t-teorija letterarja fl-Università ta’ Malta.
Min jixtieq jattendi huwa mitlub jikkuntattja l-Ambaxxata sas-26 ta’ Jannar.
Ilbieraħ fuq il-mejda tal-Kamra tad-Deputati ta’ Malta tqiegħed ir-rapport tal-Kummissjoni Elettorali dwar l-organizzazzjoni tal-elezzjoni ġenerali ta’ dis-sena.
Mir-rapport joħroġ li ntefqu €1,930,997 f’sussidju għat-titjiriet biex eletturi jiġu minn barra minn Malta ħa jivvutaw. Dan meta l-ispejjeż l-oħra kollha (inklużi spejjeż straordinarji ħabba l-covid) ammontaw għal €6,634,850. Dan ifisser li s-sussidju huwa aktar minn 22% tal-ispejjeż t’elezzjoni.
Il-bicca l-kbira ta’ titjiriet sussidjati (53%) bdew minn Londra, bi Brussell fit-tieni post (23%).
L-Ambaxxatur Malti ġdid għall-Belġju, l-E.T. Clint Tanti, bagħat messaġġ lill-komunità Maltija fil-pajjiż:
Għeżież ħbieb membri tal-komunità Maltija fil-Belġju,
Hu ta’ pjaċir u unur għalija ninfurmakom li għadni kif bdejt inservi bħala l-Ambaxxatur innominat ta’ Malta għall-Belġju.
Peress li ħdimt u għext il-Belġju għal madwar sitt snin, ikolli ngħid li jien familjari mal-isfidi u l-opportunitajiet tal-komunità dejjem tikber tal-Maltin fil-Belġju. Madankollu, nemmen li l-aħjar ħaġa li nista’ nagħmel f’dan l-istadju bikri tal-mandat tiegħi hi li nisma’ l-ideat u l-aspettattivi tagħkom. Ħa nkun qed nagħmel ħilti biex niltaqa’ magħkom kemm jista’ jkun fil-ġimgħat li ġejjin, iżda nħeġġiġkom taqsmu magħna suġġerimenti u inizjattivi biex jissaħħaħ is-sens ta’ komunità bejn il-Maltin fil-Belġju u biex jiġu indirizzati kwistjonijiet li l-komunità qed tiffaċja bħalissa. Nistidinkom li żżommu kuntatt regolari mal-Ambaxxata bħala r-rappreżentanza tagħkom fil-Belġju.
Flimkien mal-kollegi ħa nkun qed nagħmel l-almu tiegħi sabiex insaħħaħ ir-relazzjonijiet bilaterali eċċellenti bejn Malta u l-Belġju u biex niffaċilita u nippromwovi l-kummerc bejn iż-żewġ pajjiżi. Insaħħu r-rabtiet eżistenti u nesploraw koperazzjoni f’oqsma oħra.
Filwaqt li nselli għalikom bit-tama li niltaqgħu fil-futur qarib, nirringrazzjakom tal-attenzjoni tagħkom.
Clint Tanti
Id-dramm They blew her up ta’ Herman Grech se jkun qed jittella’ f’KVS fi Brussell fl-4 u l-5 ta’ Mejju fit-8.30 p.m. Id-dramm huwa bbażat fuq l-assassinju ta’ Daphna Caruana Galizia fl-2017 u huwa produzzjoni ta’ Spazju Kreattiv.
Min mhux se jkun Malta nhar l-elezzjoni propja fis-26 ta’ Marzu jista’ jivvota kmieni, ġimgħa qabel, fid-19 ta’ Marzu. Biex jagħmel hekk dak li jkun ikun irid jieħu ġurament sa lejliet f’nofsinhar.
Minbarra fl-Ufficju Elettorali l-Belt dan il-ġurament se jkun jista’ jittieħed fl-ambaxxati fusthom dik f’Brussell.
Il-Gvern Malti ħabbar titjiriet issusidjati għall-Maltin ta’ barra għall-elezzjoni ġenerali tas-26 ta’ Marzu kif ukoll għal dawk li jixtiequ jivvutaw ġimgħa kmieni. Il-perjodu għall-booking jiftaħ nhar il-Ħamis u jkun miftuħ mit-Tnejn sal-Ħadd mit-8.00 a.m. sad-9.00 p.m.
Bħal kull sena, qed naħdmu mal-Ambaxxata Maltija, niġbru donazzjonijiet sabiex issir għotja lill-Malta Community Chest Fund Foundation waqt L-Istrina f’isem il-komunitajiet Maltin tal-Belġju u l-Lussemburgu.
Minħabba c-cirkustanzi, dis-sena l-Ambaxxata mhux se torganizza attivitajiet tal-Milied u allura mhux se jkun hemm opportunità li jsir ġbir waqt dawn l-attivitajiet.
Continue ReadingSkont tweġiba għal mistoqsija parlamentari, in-numru ta’ studenti Maltin fl-Iskejjel Ewropej għas-sena skolastika li għaddiet kien ta’ 163 (żieda fuq snin imgħoddija). Dawn kienu mqassmin f’21 student fic-ciklu ta’ nursery/kindergarten fl-iskejjel ta’ Brussell u l-Lussemburgu, 79 fic-ciklu tal-Primarja fl-iskejjel ta’ Brussell, il-Lussemburgu, Frankfurt u Munich u 63 fic-ciklu tas-Sekondarja fl-iskejjel ta’ Brussell, Lussemburgu u Varese.
Maltin fil-Belġju 