Messaġġ mill-Ambaxxatur il-ġdid

L-Ambaxxatur Malti ġdid għall-Belġju, l-E.T. Clint Tanti, bagħat messaġġ lill-komunità Maltija fil-pajjiż:

Għeżież ħbieb membri tal-komunità Maltija fil-Belġju,

Hu ta’ pjaċir u unur għalija ninfurmakom li għadni kif bdejt inservi bħala l-Ambaxxatur innominat ta’ Malta għall-Belġju.

Peress li ħdimt u għext il-Belġju għal madwar sitt snin, ikolli ngħid li jien familjari mal-isfidi u l-opportunitajiet tal-komunità dejjem tikber tal-Maltin fil-Belġju. Madankollu, nemmen li l-aħjar ħaġa li nista’ nagħmel f’dan l-istadju bikri tal-mandat tiegħi hi li nisma’ l-ideat u l-aspettattivi tagħkom. Ħa nkun qed nagħmel ħilti biex niltaqa’ magħkom kemm jista’ jkun fil-ġimgħat li ġejjin, iżda nħeġġiġkom taqsmu magħna suġġerimenti u inizjattivi biex jissaħħaħ is-sens ta’ komunità bejn il-Maltin fil-Belġju u biex jiġu indirizzati kwistjonijiet li l-komunità qed tiffaċja bħalissa. Nistidinkom li żżommu kuntatt regolari mal-Ambaxxata bħala r-rappreżentanza tagħkom fil-Belġju.

Flimkien mal-kollegi ħa nkun qed nagħmel l-almu tiegħi sabiex insaħħaħ ir-relazzjonijiet bilaterali eċċellenti bejn Malta u l-Belġju u biex niffaċilita u nippromwovi l-kummerc bejn iż-żewġ pajjiżi. Insaħħu r-rabtiet eżistenti u nesploraw koperazzjoni f’oqsma oħra.

Filwaqt li nselli għalikom bit-tama li niltaqgħu fil-futur qarib, nirringrazzjakom tal-attenzjoni tagħkom.

Clint Tanti

Ġurament mill-ambaxxati għal votazzjoni kmieni

Min mhux se jkun Malta nhar l-elezzjoni propja fis-26 ta’ Marzu jista’ jivvota kmieni, ġimgħa qabel, fid-19 ta’ Marzu. Biex jagħmel hekk dak li jkun ikun irid jieħu ġurament sa lejliet f’nofsinhar.

Minbarra fl-Ufficju Elettorali l-Belt dan il-ġurament se jkun jista’ jittieħed fl-ambaxxati fusthom dik f’Brussell.

Passaporti ikkunsinjati fil-Belġju

Fi tweġiba għal mistoqsija parlamentari, l-Onor. Byron Camilleri, Ministru tal-Intern, ta cifri dwar in-numru ta’ passaporti Maltin ikkunsinjati f’ambaxxati u konsolati barra minn Malta bejn l-2016 u l-2020. In-numru ta’ passaporti ikkunsinjati mill-Ambaxxata Maltija fi Brussell żamm mat-tendenza tas-snin ta’ qabel: 101 fl-2016, 106 fl-2017, 119 fl-2018, 129 fl-2019 u 109 fl-2020.

Dan ukoll iqiegħed lill-Belġju immedjatament wara l-pajjiżi Anglofoni (ir-Renju Unit, l-Istati Uniti, l-Awstralja u l-Kanada) fin-numru ta’ passaporti ikkonsenjati.

Forum virtwali għaż-Żgħażagħ Maltin ta’ barra

Il-Ministeru Malti tal-Affarijiet Barranin u Ewropej qed jistieden liż-żgħażagħ Maltin ta’ barra biex jibgħatu l-veduti tagħhom permezz ta’ kwestjonarju in preparazzjoni tal-ewwel Forum Virtwali għaż-Żgħażagħ. Il-kwestjonarju jibqa’ miftuħ sal-Ġimgħa, 18 ta’ Ġunju f’nofsinhar.

Laqgħat tal-Kunsill għall-Maltin li jgħixu barra minn Malta

Il-Ministru tal-Affarijiet Barranin informa lill-Kamra tad-Deputati li l-aħħar żewġ laqgħat tal-Kunsill għall-Maltin li jgħixu barra minn Malta saru b’mod virtwali f’Ottubru u fi Frar. Il-minuti tal-laqgħa t’Ottubru tqiegħdu fuq il-mejda tal-Kamra.

Rapport tal-2020 dwar ic-Cittadinanza Ewropea

Il-Kummissjoni Ewropea għadha kemm ippubblikat ir-raba’ rapport dwar ic-cittadinanza Ewropea (l-aħħar wieħed kien dak tal-2017). Ir-rapport ta’ dis-sena jipproponi t-tisħiħ ta’ partecipazzjoni demokratika (fost l-oħrajn, b’regoli dwar il-votanti mobbli), iffacilitar tal-moviment ħieles, il-ħarsien u l-promozzjoni tac-cittadinanza Ewropea u l-ħarsien ta’ cittadini Ewropej fi żmien ta’ kriżi.

Ħidma tal-Ambaxxata Maltija fi Brussell

Fuq mistoqsija parlamentari tal-Onor. Carm Mifsud Bonnici, il-Ministru Malti tal-Affarijiet Barranin ta rendikont tal-ħidma tal-Ambaxxata Maltija fi Brussell mill-bidu tas-sena ‘l hawn.

Servizz ta’ Consul-on-the-move

Il-Ministru Malti tal-Affarijiet Barranin qal li dis-sena ma sarux talbiet għal fondi addizzjonali għall-programm Consul-on-the-move minħabba li ma kienx hemm talba għal żieda fin-numru ta’ pajjiżi fejn jiġi offrut dan is-servizz. Barraminnhekk, iż-żjarat ippjanati taħt dan il-programme tħassru minħabba l-covid-19.

Il-programm kien varat fl-2016 iżda, sa llum, is-servizz qatt ma kien offrut fil-Belġju.

Kwestjonarju dwar il-Konvenzjoni tal-Maltin ta’ barra

Id-Direttorat għall-Affarijiet Konsolari u Maltin ta’ Barra vara kwestjonarju dwar il-Konvenzjoni għall-Maltin ta’ barra li kienet ippjanata għal Ottubru. Il-Maltin ta’ barra qed jiġu mistiedna jippartecipaw sat-Tnejn, 10 t’Awwissu f’nofsinar.

Informazzjoni dwar il-Kunsill għall-Maltin ta’ barra

Fi tweġiba għal mistoqsija parlamentari, il-Ministru tal-Affarijiet Barranin qal li hu infurmat li l-assoċjazzjonijiet Maltin attivi barra minn Malta m’għandhomx diffikultajiet biex jgħaddu informazzjoni mill-Kunsill għall-Maltin li jgħixu barra minn Malta lill-membri rispettivi tagħhom.

Il-Ministru qal ukoll li, f’dan l-istadju, ma jħossx li għandu jikkonsidra għajnuna finanzjarja u loġistika lil dawn assoċjazzjonijiet biex jinfurmaw aħjar lill-membri. Dan għax fil-ħidma ippjanata tal-Kunsill hemm diġa’ maħsubin miżuri biex jindirizzaw xi lakuni li jista’ jkun hemm bl-użu aktar effiċjenti tal-informatika. Filfatt, il-Gvern qed jaħseb biex isaħħaħ l-infrastruttura diġitali tiegħu biex, fuq medda ta’ żmien, il-Maltin li jgħixu barra minn Malta jkollhom sit elettroniku ddedikat għalihom.

Fi tweġiba separata, l-Ministru qal li s-Segretarju tal-Kunsill reġa’ nħatar għal tlett snin.