Passaporti ikkunsinjati fil-Belġju

Fi tweġiba għal mistoqsija parlamentari, l-Onor. Byron Camilleri, Ministru tal-Intern, ta cifri dwar in-numru ta’ passaporti Maltin ikkunsinjati f’ambaxxati u konsolati barra minn Malta bejn l-2016 u l-2020. In-numru ta’ passaporti ikkunsinjati mill-Ambaxxata Maltija fi Brussell żamm mat-tendenza tas-snin ta’ qabel: 101 fl-2016, 106 fl-2017, 119 fl-2018, 129 fl-2019 u 109 fl-2020.

Dan ukoll iqiegħed lill-Belġju immedjatament wara l-pajjiżi Anglofoni (ir-Renju Unit, l-Istati Uniti, l-Awstralja u l-Kanada) fin-numru ta’ passaporti ikkonsenjati.

Rapport tal-2020 dwar ic-Cittadinanza Ewropea

Il-Kummissjoni Ewropea għadha kemm ippubblikat ir-raba’ rapport dwar ic-cittadinanza Ewropea (l-aħħar wieħed kien dak tal-2017). Ir-rapport ta’ dis-sena jipproponi t-tisħiħ ta’ partecipazzjoni demokratika (fost l-oħrajn, b’regoli dwar il-votanti mobbli), iffacilitar tal-moviment ħieles, il-ħarsien u l-promozzjoni tac-cittadinanza Ewropea u l-ħarsien ta’ cittadini Ewropej fi żmien ta’ kriżi.

Servizz ta’ Consul-on-the-move

Il-Ministru Malti tal-Affarijiet Barranin qal li dis-sena ma sarux talbiet għal fondi addizzjonali għall-programm Consul-on-the-move minħabba li ma kienx hemm talba għal żieda fin-numru ta’ pajjiżi fejn jiġi offrut dan is-servizz. Barraminnhekk, iż-żjarat ippjanati taħt dan il-programme tħassru minħabba l-covid-19.

Il-programm kien varat fl-2016 iżda, sa llum, is-servizz qatt ma kien offrut fil-Belġju.

Reġistrazzjoni t’ismijiet b’diakritici Maltin

Wara d-diskussjoni fil-media (bil-partecipazzjoni, fost l-oħrajn, tal-Akkademja tal-Malti), il-Ministru Byron Camilleri ħabbar li Identity Malta u MITA qed jaħdmu biex ikun possibbli jintużaw diakritici Maltin (ċ, ġ, ħ u ż) fir-reġistrazzjoni u l-korrezzjoni t’ismijiet.

Il-Ministru ħabbar ukoll li se jiġi ppubblikat abbozz ta’ liġi biex korrezzjonijiet ikunu jistgħu jsiru b’semplici talba lid-Direttur tar-Reġistru Pubbliku u minflok b’rikors fil-Qorti.

Reġistrazzjoni volontarja ta’ Maltin ta’ barra

Hemm biss 23 Malti residenti l-Belġju li irreġistraw mal-Ministeru tal-Affarijiet Barranin Malti minn total ta’ 5,592. Din hija reġistrazzjoni volontarja u ssir permezz tan-Notifika D.

Aġġornament (08.06.2020): Il-Ministru ħabbar li qed jiġu ikkunsidrati modi kif din in-Notifika tista’ tkun iżjed magħrufa permezz ta’ iżjed pubbliċità u metodi aktar moderni kif wieħed ikun jista’ jaċċessaha biex jimliha u jibgħatha minnufih.

Aġġornament (15.10.2020): Il-Ministru ħabbar li n-numru ta’ Maltin irreġistrati permezz tan-Notifika D sa Settembru kien ta’ 522.

Ordni dwar ħelsien minn taxxa doppja

Il-Gvern Malti ħabbar li emenda tal-2013 għall-ftehim bejn Malta u l-Belġju dwar il-ħelsien minn taxxa doppja fuq id-dħul daħal fis-seħħ.

Ħidma tal-Ambaxxata fi Brussell

Fuq mistoqsija Parlamentari, il-Ministru tal-Affarijiet Barranin Carmelo Abela ta rendikont tal-ħidma tal-Ambaxxata Maltija fi Brussell matul l-ewwel erba’ xhur ta’ dis-sena.

Minbarra l-ħidma bilaterali fuq l-oqsma kummercjali u kulturali, l-ambaxxata kienet attiva wkoll fil-qasam konsolari. Filfatt, matul dan il-perjodu, kien hemm:

• 12-il reġistrazzjoni tat-twelid
• żewġ reġistrazzjonijiet taż-żwieġ jew divorzju
• tliet applikazzjoni għac-cittadinanza
• tliet prokuri
• 36 dikjarazzjoni bil-ġurament (relatati mal-votazzjoni kmieni għall-elezzjonijiet Europej u lokali)
• 71 applikazzjoni għal passaport, erba’ dokumenti ta’ vjaġġar t’emerġenza
• erba’ passaporti diplomatiċi
• 13-il talba għal informazzjoni dwar rekwiżiti għal viża għal Malta.

Ġurament minn barra għal votazzjoni kmieni

Il-Kummissjoni Elettorali tavża li dawk li mhux se jkunu Malta għall-elezzjonijiet lokali u Ewropej fil-25 ta’ Mejju jistgħu jivvutaw kmieni nhar is-Sibt, 18 ta’ Mejju. Dawk irreġistrati Malta jivvotaw fil-Kumpless tal-Għadd tal-Voti fin-Naxxar waqt li dawk irreġistrati Għawdex jivvotaw fl-Experimental Farm tal-Gvern fix-Xewkija. Il-ħinijiet tal-votazzjoni jkunu mis-7.00am sal-10.00pm u kull votant irid jippreżenta d-dokumenti tal-vot tiegħu.

Biex tivvota kmieni trid tieħu ġurament sal-Ġimgħa, 17 ta’ Mejju f’nofsinhar. Dan il-ġurament jista’ jittieħed f’Malta fl-ufficji tal-Kummissjoni jew għand Kummissjonarju għall-Ġuramenti fl-Ambaxxati jew Kummissjonijiet Għolja indikati.

Aġġornament (29/04/2019): Il-Gvern Malti ħabbar titjiriet issussidjati għal min irid jivjaġġa biex jivvota.

Trasferiment tal-valur tal-pensjoni

Fuq mistoqsija tal-Onor. Ivan Bartolo, il-Ministru tal-Familja, Drittijiet tat-Tfal u Solidarjetà Soċjali ta informazzjoni dwar it-trasferiment tal-valur ta’ kontribuzzjonijiet għal pensjoni Maltija għal dik Ewropea.

Mill-2016 sa llum kien hemm b’kollox 22 talba (4 fl-2016, 11 fl-2017 u 7 fl-2018) li minnhom 12 kienu accettati, 6 irtirati u l-bqija għadhom pendenti. Kif mistenni, dawn in-numri jirrappreżentaw tnaqqis żgħir minn numri fl-ewwel snin wara li ddaħħlet l-iskema.

Dokument Provviżorju tal-Ivvjaġġar tal-UE

Fl-1 ta’ Mejju daħlet fis-seħħ id-Direttiva dwar il-Protezzjoni Konsolari. Permezz tagħha, cittadin Malti jista’ jitlob protezzjoni konsolari f’konsolat ta’ kwalunkwe pajjiż tal-UE meta jkun barra l-UE. Issa jmiss li din tiġi ikkumplimentata b’aġġornament tad-Direttiva dwar dokument proviżorju tal-ivvjaġġar (bħal passaport t’emerġenza).

Il-Gvern Malti għadu kemm ħa pożizzjoni favorevoli għall-proposta tal-Kummissjoni f’dan is-sens u li ttejjeb is-sigurtà tad-dokument. Huwa intiż li d-dokument ikun disponibbli wkoll fil-missjonijiet Maltin barra minn Malta.