Spejjeż tat-titjiriet issussidjati fl-elezzjoni ġenerali 2022

Ilbieraħ fuq il-mejda tal-Kamra tad-Deputati ta’ Malta tqiegħed ir-rapport tal-Kummissjoni Elettorali dwar l-organizzazzjoni tal-elezzjoni ġenerali ta’ dis-sena.

Mir-rapport joħroġ li ntefqu €1,930,997 f’sussidju għat-titjiriet biex eletturi jiġu minn barra minn Malta ħa jivvutaw. Dan meta l-ispejjeż l-oħra kollha (inklużi spejjeż straordinarji ħabba l-covid) ammontaw għal €6,634,850. Dan ifisser li s-sussidju huwa aktar minn 22% tal-ispejjeż t’elezzjoni.

Il-bicca l-kbira ta’ titjiriet sussidjati (53%) bdew minn Londra, bi Brussell fit-tieni post (23%).

Dramm Malti f’KVS

Id-dramm They blew her up ta’ Herman Grech se jkun qed jittella’ f’KVS fi Brussell fl-4 u l-5 ta’ Mejju fit-8.30 p.m. Id-dramm huwa bbażat fuq l-assassinju ta’ Daphna Caruana Galizia fl-2017 u huwa produzzjoni ta’ Spazju Kreattiv.

Ġurament mill-ambaxxati għal votazzjoni kmieni

Min mhux se jkun Malta nhar l-elezzjoni propja fis-26 ta’ Marzu jista’ jivvota kmieni, ġimgħa qabel, fid-19 ta’ Marzu. Biex jagħmel hekk dak li jkun ikun irid jieħu ġurament sa lejliet f’nofsinhar.

Minbarra fl-Ufficju Elettorali l-Belt dan il-ġurament se jkun jista’ jittieħed fl-ambaxxati fusthom dik f’Brussell.

Passaporti ikkunsinjati fil-Belġju

Fi tweġiba għal mistoqsija parlamentari, l-Onor. Byron Camilleri, Ministru tal-Intern, ta cifri dwar in-numru ta’ passaporti Maltin ikkunsinjati f’ambaxxati u konsolati barra minn Malta bejn l-2016 u l-2020. In-numru ta’ passaporti ikkunsinjati mill-Ambaxxata Maltija fi Brussell żamm mat-tendenza tas-snin ta’ qabel: 101 fl-2016, 106 fl-2017, 119 fl-2018, 129 fl-2019 u 109 fl-2020.

Dan ukoll iqiegħed lill-Belġju immedjatament wara l-pajjiżi Anglofoni (ir-Renju Unit, l-Istati Uniti, l-Awstralja u l-Kanada) fin-numru ta’ passaporti ikkonsenjati.

Miżuri kontra t-tixrid tal-Covid-19

Il-miżuri mħabbra mill-Gvern Belġjan kontra t-tixrid tal-Covid-19 jistabu hawn. Dawn il-miżuri se jibqgħu fis-seħħ sal-5 t’April.

Aġġornament (27/03/2020): Il-miżuri ġew aġġornati. Dawn issa qed jidhru fuq is-sit dedikat https://www.info-coronavirus.be/.

Quddiesa u riceviment tal-Milied

L-Ambaxxata Maltija għall-Belġju ħarġet stedina għal attività tal-Milied, il-Ġimgħa, 13 ta’ Dicembru f’Dar Malta (Rue Archimède 25, Brussell). L-attività tibda b’quddiesa fis-6.30 p.m. u tkompli b’riceviment fis-7.15 p.m. Ikun apprezzat jekk l-attendenza tkun avżata b’email (events.brussels@gov.mt).

Ħidma tal-Ambaxxata fi Brussell

Fuq mistoqsija Parlamentari, il-Ministru tal-Affarijiet Barranin Carmelo Abela ta rendikont tal-ħidma tal-Ambaxxata Maltija fi Brussell matul l-ewwel erba’ xhur ta’ dis-sena.

Minbarra l-ħidma bilaterali fuq l-oqsma kummercjali u kulturali, l-ambaxxata kienet attiva wkoll fil-qasam konsolari. Filfatt, matul dan il-perjodu, kien hemm:

• 12-il reġistrazzjoni tat-twelid
• żewġ reġistrazzjonijiet taż-żwieġ jew divorzju
• tliet applikazzjoni għac-cittadinanza
• tliet prokuri
• 36 dikjarazzjoni bil-ġurament (relatati mal-votazzjoni kmieni għall-elezzjonijiet Europej u lokali)
• 71 applikazzjoni għal passaport, erba’ dokumenti ta’ vjaġġar t’emerġenza
• erba’ passaporti diplomatiċi
• 13-il talba għal informazzjoni dwar rekwiżiti għal viża għal Malta.

Ġurament minn barra għal votazzjoni kmieni

Il-Kummissjoni Elettorali tavża li dawk li mhux se jkunu Malta għall-elezzjonijiet lokali u Ewropej fil-25 ta’ Mejju jistgħu jivvutaw kmieni nhar is-Sibt, 18 ta’ Mejju. Dawk irreġistrati Malta jivvotaw fil-Kumpless tal-Għadd tal-Voti fin-Naxxar waqt li dawk irreġistrati Għawdex jivvotaw fl-Experimental Farm tal-Gvern fix-Xewkija. Il-ħinijiet tal-votazzjoni jkunu mis-7.00am sal-10.00pm u kull votant irid jippreżenta d-dokumenti tal-vot tiegħu.

Biex tivvota kmieni trid tieħu ġurament sal-Ġimgħa, 17 ta’ Mejju f’nofsinhar. Dan il-ġurament jista’ jittieħed f’Malta fl-ufficji tal-Kummissjoni jew għand Kummissjonarju għall-Ġuramenti fl-Ambaxxati jew Kummissjonijiet Għolja indikati.

Aġġornament (29/04/2019): Il-Gvern Malti ħabbar titjiriet issussidjati għal min irid jivjaġġa biex jivvota.

Dritt tal-vot fl-elezzjonijiet reġjonali

Il-Parlament Brussellin għadda riżoluzzjoni favur id-dritt tal-vot għal residenti mhux Belġjani.

Huwa stmat li wieħed minn kull tlett resident tar-reġjun ta’ Brussell Kapitali m’għandux dritt jivvota. Huma esklużi wkoll ir-residenti Ewropej mhux Belġjani li d-dritt tal-vot tagħhom huwa limitat għall-elezzjonijiet municipali u Ewropej.

Din ir-riżoluzzjoni fiha nnifisha ma tagħtix id-dritt peress li din hija kompetenza federali imma hija meqjusa bħala sinjal importanti tal-fehema tal-awtoritajiet politici Brussellini.

Kittieba Maltin fi Brussell

Żewġ kittieba Maltin — Lou Drofenik u Loranne Vella — se jkunu qed jieħdu sehem f’avvenimenti letterarji f’Librebook fi Brussell.

L-ewwel avventiment se jkun nhar is-Sibt, 16 ta’ Marzu fit-3 p.m. fejn Drofenik se tkun qed titkellem fuq Women’s stories from Malta. Fit-tieni avveniment Vella se tkun qed tieħu sehem mal-kittieb Ġermaniż Roland Siegloff bit-tema Dystopic fiction for a post-Brexit EU (it-Tlieta, 19 ta’ Marzu fis-7 p.m.).

L-avvenimenti, li se jsiru f’Librebook (Chaussée de Wavre 128) huma f’kollaborazzjoni mal-Kunsill Nazzjonali tal-Ktieb ta’ Malta.