Passaporti ikkunsinjati fil-Belġju

Fi tweġiba għal mistoqsija parlamentari, l-Onor. Byron Camilleri, Ministru tal-Intern, ta cifri dwar in-numru ta’ passaporti Maltin ikkunsinjati f’ambaxxati u konsolati barra minn Malta bejn l-2016 u l-2020. In-numru ta’ passaporti ikkunsinjati mill-Ambaxxata Maltija fi Brussell żamm mat-tendenza tas-snin ta’ qabel: 101 fl-2016, 106 fl-2017, 119 fl-2018, 129 fl-2019 u 109 fl-2020.

Dan ukoll iqiegħed lill-Belġju immedjatament wara l-pajjiżi Anglofoni (ir-Renju Unit, l-Istati Uniti, l-Awstralja u l-Kanada) fin-numru ta’ passaporti ikkonsenjati.

Servizz ta’ Consul-on-the-move

Il-Ministru Malti tal-Affarijiet Barranin qal li dis-sena ma sarux talbiet għal fondi addizzjonali għall-programm Consul-on-the-move minħabba li ma kienx hemm talba għal żieda fin-numru ta’ pajjiżi fejn jiġi offrut dan is-servizz. Barraminnhekk, iż-żjarat ippjanati taħt dan il-programme tħassru minħabba l-covid-19.

Il-programm kien varat fl-2016 iżda, sa llum, is-servizz qatt ma kien offrut fil-Belġju.

Ħidma tal-Ambaxxata fi Brussell

Fuq mistoqsija Parlamentari, il-Ministru tal-Affarijiet Barranin Carmelo Abela ta rendikont tal-ħidma tal-Ambaxxata Maltija fi Brussell matul l-ewwel erba’ xhur ta’ dis-sena.

Minbarra l-ħidma bilaterali fuq l-oqsma kummercjali u kulturali, l-ambaxxata kienet attiva wkoll fil-qasam konsolari. Filfatt, matul dan il-perjodu, kien hemm:

• 12-il reġistrazzjoni tat-twelid
• żewġ reġistrazzjonijiet taż-żwieġ jew divorzju
• tliet applikazzjoni għac-cittadinanza
• tliet prokuri
• 36 dikjarazzjoni bil-ġurament (relatati mal-votazzjoni kmieni għall-elezzjonijiet Europej u lokali)
• 71 applikazzjoni għal passaport, erba’ dokumenti ta’ vjaġġar t’emerġenza
• erba’ passaporti diplomatiċi
• 13-il talba għal informazzjoni dwar rekwiżiti għal viża għal Malta.

Dokument Provviżorju tal-Ivvjaġġar tal-UE

Fl-1 ta’ Mejju daħlet fis-seħħ id-Direttiva dwar il-Protezzjoni Konsolari. Permezz tagħha, cittadin Malti jista’ jitlob protezzjoni konsolari f’konsolat ta’ kwalunkwe pajjiż tal-UE meta jkun barra l-UE. Issa jmiss li din tiġi ikkumplimentata b’aġġornament tad-Direttiva dwar dokument proviżorju tal-ivvjaġġar (bħal passaport t’emerġenza).

Il-Gvern Malti għadu kemm ħa pożizzjoni favorevoli għall-proposta tal-Kummissjoni f’dan is-sens u li ttejjeb is-sigurtà tad-dokument. Huwa intiż li d-dokument ikun disponibbli wkoll fil-missjonijiet Maltin barra minn Malta.

Abbozz ta’ liġi dwar notifika elettronika ta’ twelid u mewt

Il-Parlament Malti beda t-tieni qari tal-abbozz ta’ liġi (nru. 61) biex, fost l-oħrajn, jidħlu notifici elettronici ta’ twelid u mewt. L-Onor. Julia Farrugia-Portelli, li ppreżentat l-abbozz għall-Gvern, spjegat kif se jsir possibbli li, pereżempju, ġenitur jew ġenituri jkunu jistgħu jirreġistraw it-twelid tat-tarbija tagħhom bl-identità elettronika (eID) tagħhom mingħajr il-bżonn li jkollhom imorru fiżikament f’ufficju ta’ Identity Malta.

Passaporti Maltin ikkunsinjati fil-Belġju fl-2017

L-Onor. Byron Camilleri staqsa lill-Prim Ministru dwar in-numru ta’ passaporti mġedda minn Ambaxxati Maltin fl-2017. L-istatistika turi li, minn total ta’ 3,271 kien hemm 109 mill-Ambaxxata għall-Belġju. In-numru huwa konsistenti mat-tendenza li toħroġ mic-cifri għas-snin 2001-2015.

Rapport dwar il-Portal Diġitali Uniku tal-UE

Kien approvat rapport tal-MEP Marlene Mizzi dwar il-proposta tal-Kummissjoni Ewropea għal Portal Diġitali Uniku tal-UE. Il-Portal se jkun jipprovdi informazzjoni centralizzata għal dawk li jridu jeżercitaw id-dritt ta’ mobilità fl-UE. L-access għal proċeduri importanti u li jintużaw l-aktar spiss se jkun online, sħiħ u non-diskriminatorju. Eżempji jinkludu applikazzjonijiet għal certifikati tat-twelid, reġistrazzjoni ta’ karozzi, il-Karta tas-Saħħa Ewropea, self għal studju u għotjiet u permessi għall-kummerc.

Rappreżentanza konsolari f’pajjiżi terzi

Fl-1 ta’ Mejju daħlet fis-seħħ miżura dwar ir-rappreżentanza konsolari barra mill-UE. F’emerġenza, cittadini tal-UE li jkollhom bżonn għajnuna konsolari f’pajjiż li mhux fl-UE fejn ma jkunx hemm ambaxxata jew konsolat ta’ pajjiżhom jistgħu jinqdew f’konsolat ta’ pajjiż ieħor tal-UE.

Dan skont id-Direttiva tal-Kunsill (UE) 2015/637 li Malta applikat permezz tal-Att dwar il-Protezzjoni Konsulari lil Ċittadini Mhux Rappreżentati (Kap. 580).

Tibdil ta’ kunjom permezz ta’ deed poll

Il-Qorti Maltija ordnat lid-Direttur tar-Reġistru Pubbliku biex jagħmel korrezzjoni li tirrifletti bidla f’kunjom ta’ persuna li saret permezz ta’ deed poll barra minn Malta (ref. 330/2017).

Passaporti u karti tal-identità bil-ġeneru “X”

Is-Segretarju Parlamentari Julia Farrugia Portelli ħabbret li Identity Malta ħarġet l-ewwel passaport u karta tal-identità Maltin b'”X” għall-ġeneru. Il-miżura, li kienet introdotta f’Settembru, tippermetti li persuna tagħżel li tidentifika l-ġeneru tagħha b’din il-marka minflok b’raġel jew mara fil-passaport, karta tal-identità jew permess ta’ residenza.