Lejla Letterarja ma’ Immanuel Mifsud (3/2/23, 6 p.m.)

L-Ambaxxata Maltija għall-Belġju se torganizza lejla letterarja mal-awtur u poeta Immanuel Mifsud il-Ġimgħa, 3 ta’ Frar, mis-6 p.m. sas-7 p.m. f’Dar Malta (Rue Archimède 25, Brussell).

Mifsud huwa rebbieħ ta’ bosta premji nazzjonali u internazzjonali u x-xogħlijiet tiegħu ġew tradotti fi ħdax-il lingwa. Għandu dottorat fil-letteratura u jgħallem il-letteratura kontemporanja Maltija u t-teorija letterarja fl-Università ta’ Malta.

Min jixtieq jattendi huwa mitlub jikkuntattja l-Ambaxxata sas-26 ta’ Jannar.

Politika kulturali nazzjonali 2021

Il-Ministeru għall-Wirt Nazzjonali, l-Arti u l-Gvern Lokali għadu kemm fetaħ konsultazzjoi pubblika dwar politika kulturali nazzjonali.

L-abbozz ta’ dokument jinkludi sezzjoni fuq id-diaspora Maltija u jipproponi żewġ miżuri: appoġġ kontinwu għat‑tagħlim tal‑lingwa Maltija u għat‑tagħlim tal‑aspetti kulturali li jikkostitwixxu markaturi bażiċi tal‑etos nazzjonali u appoġġ għall‑ħolqien konġunt ta’ proġetti artistiċi u kulturali li jgħaqqdu komunitajiet interġenerazzjonali ma’ Malta, il‑Maltin u r‑residenti ta’ Malta.

Il-konsultazzjoni hija miftuħa sas-16 t’April.

Laqgħat tal-Kunsill għall-Maltin li jgħixu barra minn Malta

Il-Ministru tal-Affarijiet Barranin informa lill-Kamra tad-Deputati li l-aħħar żewġ laqgħat tal-Kunsill għall-Maltin li jgħixu barra minn Malta saru b’mod virtwali f’Ottubru u fi Frar. Il-minuti tal-laqgħa t’Ottubru tqiegħdu fuq il-mejda tal-Kamra.

Reġistrazzjoni t’ismijiet b’diakritici Maltin

Wara d-diskussjoni fil-media (bil-partecipazzjoni, fost l-oħrajn, tal-Akkademja tal-Malti), il-Ministru Byron Camilleri ħabbar li Identity Malta u MITA qed jaħdmu biex ikun possibbli jintużaw diakritici Maltin (ċ, ġ, ħ u ż) fir-reġistrazzjoni u l-korrezzjoni t’ismijiet.

Il-Ministru ħabbar ukoll li se jiġi ppubblikat abbozz ta’ liġi biex korrezzjonijiet ikunu jistgħu jsiru b’semplici talba lid-Direttur tar-Reġistru Pubbliku u minflok b’rikors fil-Qorti.

Roadmap dwar il-Maltin ta’ barra

Il-Ministru tal-Affarijiet Barranin qiegħed fuq il-mejda tal-Kamra r-roadmap li kien qabel fuqha il-Kunsill għall-Maltin li jgħixu barra minn Malta fil-laqgħa t’Ottubru 2017. Il-proposti huma miġburin taħt numru ta’ kapitli: Akkademici, Studenti u Ricerkaturi, il-Familja, Pensjonanti u Anzjani, Żgħażagħ u l-Gvern ta’ Malta.

Laqgħa tal-Kunsill għall-Maltin ta’ barra

L-Onor. Carmelo Abela, Ministru tal-Affarijiet Barranin, ħabbar li l-laqgħa li jmiss tal-Kunsill għall-Maltin li jgħixu barra minn Malta se ssir fid-19 u l-20 t’Ottubru.

Funzjoni ġdida għall-Kunsill Nazzjonali tal-Ilsien Malti

Fil-Gazzetta tal-Gvern għadu kemm kien ippubblikat abbozz ta’ liġi biex jiġi emendat l-Att dwar l-Ilsien Malti (Kap. 470 tal-Liġijiet ta’ Malta).

Fost affarijiet oħra, dan l-abbozz jipproponi li jżid mal-funzjonijiet tal-Kunsill Nazzjonali tal-Ilsien Malti mwaqqaf bl-Att li “iżomm kuntatt kontinwu mal-komunitajiet tal-Maltin ta’ barra u mar-rappreżentanti tagħhom bil-ħsieb li l-ilsien Malti jibqa’ lingwa ħajja fosthom”.

Aġġornament (08/02/2017): Il-liġi kienet ippubblikata bħala Att VI tal-2017.

Laqgħa tal-Kunsill għall-Maltin ta’ barra

Il-Kunsill għall-Maltin li jgħixu barra minn Malta iltaqa’ aktar kmieni dan ix-xahar. Il-Kunsill iddiskuta l-iskema introdotta ricentement tal-Consul-on-the-move, l-impatt tal-liġijiet tal-ippjanar fuq il-Maltin ta’ barra, titjib fir-relazzjoni tal-Kunsill m’għaqdiet ta’ Maltin ta’ barra, il-pjattaforma diġitali għat-tagħlim tal-Malti barra minn Malta u ż-żamma tal-kultura Maltija barra minn Malta.

Fid-diskors tiegħu bħala l-President tal-Kunsill, il-Ministru George Vella semma’ l-Konvenzjoni tas-sena li għaddiet kif ukoll is-sħubija fil-Europeans throughout the World (ETTW) fejn Malta bħalissa tokkupa temporanjament il-Presidenza u fejn qed taqsam l-esperjenzi tagħha u taħdem favur politika barranija u Ewropea aktar sensittiva lejn id-diaspora.

Konsultazzjoni dwar il-Kunsill Nazzjonali tal-Ktieb

Fit-tfassil t’abbozz ta’ liġi ġdida dwar il-Kunsill Nazzjonali tal-Ktieb, il-Kunsill qed jorganizza numru ta’ konsultazzjonijiet, fosthom waħda f’Dar Malta fi Brussell fil-15 ta’ Marzu fis-6.30 p.m.

Progress dwar l-Istitut Kulturali Malti

Fi tweġiba parlamentari għal mistoqsija tal-Onor. Carm Mifsud-Bonnici, il-Ministru tal-Affarijiet Barranin qal li qegħdin jitfasslu emendi għall-Att dwar Kunsill għall-Maltin li Jgħixu Barra minn Malta (Kap. 515) sabiex l-Istitut Kulturali Malti jibda, fil-ġejjieni, jaqa’ taħt il-Ministeru għall-Ġustizzja, Kultura u Gvern Lokali.