Reġistru tal-artiġġjanat Malti

Qed issir sejħa lil min jipprattika xi artiġjanat Malti u li jixtieq ikun inkluż fir-Reġistru tal-Artiġjani u Intraprendituri. Dan ir-Reġistrju huwa miżmum mill-Uffiċċju tar-Reġistratur tal-Artiġjanat, Artiġjani u Intraprendituri tas-Snajja li xogħolu hu, fost l-oħrajn, li jagħmel kuntatt ma’ u jżomm kompendju ta’ Maltin li jgħixu barra u li jipprattikaw l-artiġjanat tradizzjonali Malti, sew bħala passatemp, sew għal skopijiet kummerċjali. Dan l-eżerċizzju qed isir bil-għan li jinżamm rekord ta’ dan l-artiġjanat u l-metodi ta’ produzzjoni biex iservu ta’ referenza għall-ġenerazzjonijiet futuri.

Hemm il-ħsieb li l-informazzjoni tkun disponibbli fuq il-portal tal-artiġjanat. Fil-ġejjieni, dawn l-artiġjani jistgħu jiġu mistiedna jipparteċipaw f’attivitajiet maħsuba biex jippromwovu xogħlijiet artiġjanali Maltin.

Minn hu interessat huwa mitlub jimla l-formola u jibgħatha fuq craftsregister@gov.mt.

Lejla Letterarja ma’ Immanuel Mifsud (3/2/23, 6 p.m.)

L-Ambaxxata Maltija għall-Belġju se torganizza lejla letterarja mal-awtur u poeta Immanuel Mifsud il-Ġimgħa, 3 ta’ Frar, mis-6 p.m. sas-7 p.m. f’Dar Malta (Rue Archimède 25, Brussell).

Mifsud huwa rebbieħ ta’ bosta premji nazzjonali u internazzjonali u x-xogħlijiet tiegħu ġew tradotti fi ħdax-il lingwa. Għandu dottorat fil-letteratura u jgħallem il-letteratura kontemporanja Maltija u t-teorija letterarja fl-Università ta’ Malta.

Min jixtieq jattendi huwa mitlub jikkuntattja l-Ambaxxata sas-26 ta’ Jannar.

Dramm Malti f’KVS

Id-dramm They blew her up ta’ Herman Grech se jkun qed jittella’ f’KVS fi Brussell fl-4 u l-5 ta’ Mejju fit-8.30 p.m. Id-dramm huwa bbażat fuq l-assassinju ta’ Daphna Caruana Galizia fl-2017 u huwa produzzjoni ta’ Spazju Kreattiv.

Politika kulturali nazzjonali 2021

Il-Ministeru għall-Wirt Nazzjonali, l-Arti u l-Gvern Lokali għadu kemm fetaħ konsultazzjoi pubblika dwar politika kulturali nazzjonali.

L-abbozz ta’ dokument jinkludi sezzjoni fuq id-diaspora Maltija u jipproponi żewġ miżuri: appoġġ kontinwu għat‑tagħlim tal‑lingwa Maltija u għat‑tagħlim tal‑aspetti kulturali li jikkostitwixxu markaturi bażiċi tal‑etos nazzjonali u appoġġ għall‑ħolqien konġunt ta’ proġetti artistiċi u kulturali li jgħaqqdu komunitajiet interġenerazzjonali ma’ Malta, il‑Maltin u r‑residenti ta’ Malta.

Il-konsultazzjoni hija miftuħa sas-16 t’April.

Laqgħa tal-Kunsill għall-Maltin li jgħixu barra minn Malta

Il-Kunsill għall-Maltin li jgħixu barra minn Malta ltaqa’ ricentement f’Malta. Il-Ministru Carmelo Abela elenka l-kisbiet ricenti tal-Kunsill fosthom sottotitular ta’ produzzjonijiet, kodici t’etika u tnedija ta’ Kunsilli Reġjonali. Il-Ministru ikkonferma wkoll il-Konvenzjoni għall-Maltin ta’ barra f’Ottubru tas-sena d-dieħla bit-tema “Keeping connected“.

Kittieba Maltin fi Brussell

Żewġ kittieba Maltin — Lou Drofenik u Loranne Vella — se jkunu qed jieħdu sehem f’avvenimenti letterarji f’Librebook fi Brussell.

L-ewwel avventiment se jkun nhar is-Sibt, 16 ta’ Marzu fit-3 p.m. fejn Drofenik se tkun qed titkellem fuq Women’s stories from Malta. Fit-tieni avveniment Vella se tkun qed tieħu sehem mal-kittieb Ġermaniż Roland Siegloff bit-tema Dystopic fiction for a post-Brexit EU (it-Tlieta, 19 ta’ Marzu fis-7 p.m.).

L-avvenimenti, li se jsiru f’Librebook (Chaussée de Wavre 128) huma f’kollaborazzjoni mal-Kunsill Nazzjonali tal-Ktieb ta’ Malta.

Sħubija fl-Organizzazzjoni Internazzjonali tal-Frankofonija

Malta issieħbet bħala osservatur fl-Organisation internationale de la Francophonie (OIF) li tgħaqqad dawk il-pajjiżi li għandhom il-Franciż bħala lingwa ufficjali jew għandhom konnessjonijiet storici ma’ Franza.

Il-Belġju huwa membru tal-OIF u jospita fi Brussell ir-Rappreżentanza Permanenti tal-organizzazzjoni għall-UE.

Kommemorazzjoni tat-Tielet Battalja ta’ Ieper

Il-Ministru tal-Affarijiet Barranin Carmelo Abela irrappreżenta lil Malta fil-kommemorazzjoni tal-mitt sena tat-Tielet Battalja ta’ Ieper (Ypres) magħrufa wkoll bħala l-Battalja ta’ Passchendaele.

Il-Ministru kien akkumpanjat mill-ambaxxatur ta’ Malta għall-Belġju Ray Azzopardi, f’cerimonja li għaliha attendew numru ta’ personalitajiet barranin fosthom id-Duka u d-Dukessa ta’ Cambridge, ir-Re u r-Reġina tal-Belġju u bosta ufficjali għolja ta’ pajjiżi li ħadu sehem fil-battalja inkluż il-Ministru tal-Affarijiet Barranin Ġermaniż.

Ic-cerimonja saret f’Tyne Cot Cemetery fejn, fost l-oħrajn, hemm midfun Andrew Camilleri, Malti li ħa sehem fil-battalja mal-infanterija Awstraljana. Camilleri miet ta’ 26 sena f’Ottubru 1917.

Rapport tal-2016 tal-Kunsill tal-Maltin ta’ barra

Il-Kunsill għall-Maltin li jgħixu barra minn Malta ippreżenta r-rapport annwali tiegħu għall-2016. Ir-rapport, li kien ikopri temi diskussi matul is-sena, kien diskuss mill-Kumitat Permanenti tal-Kamra tad-Deputati.

Togħma tal-letteratura Maltija fi Brussell

Fl-okkażjoni tal-Presidenza Maltija tal-UE, il-Kunsill Nazzjonali tal-Ktieb se jorganizza żewġ attivitajiet fi Brussell marbuta mal-letteratura Maltija.

Fis-17 ta’ Marzu fis-6 p.m. Alex Vella Gera u Loranne Vella se jaqraw mix-xogħolijiet tagħhom filwaqt li l-għada fis-2 p.m. ikun imiss lil Clare Azzopardi u Maria Grech Ganado. L-attivitajiet se ssir f’Librebook, Chaussée de Wavre 128, Brussell.