Informazzjoni dwar il-Kunsill għall-Maltin ta’ barra

Fi tweġiba għal mistoqsija parlamentari, il-Ministru tal-Affarijiet Barranin qal li hu infurmat li l-assoċjazzjonijiet Maltin attivi barra minn Malta m’għandhomx diffikultajiet biex jgħaddu informazzjoni mill-Kunsill għall-Maltin li jgħixu barra minn Malta lill-membri rispettivi tagħhom.

Il-Ministru qal ukoll li, f’dan l-istadju, ma jħossx li għandu jikkonsidra għajnuna finanzjarja u loġistika lil dawn assoċjazzjonijiet biex jinfurmaw aħjar lill-membri. Dan għax fil-ħidma ippjanata tal-Kunsill hemm diġa’ maħsubin miżuri biex jindirizzaw xi lakuni li jista’ jkun hemm bl-użu aktar effiċjenti tal-informatika. Filfatt, il-Gvern qed jaħseb biex isaħħaħ l-infrastruttura diġitali tiegħu biex, fuq medda ta’ żmien, il-Maltin li jgħixu barra minn Malta jkollhom sit elettroniku ddedikat għalihom.

Fi tweġiba separata, l-Ministru qal li s-Segretarju tal-Kunsill reġa’ nħatar għal tlett snin.

Statements tat-taxxa disponibbli elettronikament

Il-Kummissarju tat-Taxxi ta’ Malta ħabbar li minn issa ‘l quddiem l-istatements tat-taxxa fuq id-dħul (income tax) se jkunu disponibbli wkoll elettronikament. Is-servizz jista’ jiġi accessat permezz tal-e-ID.

Rapport dwar il-Portal Diġitali Uniku tal-UE

Kien approvat rapport tal-MEP Marlene Mizzi dwar il-proposta tal-Kummissjoni Ewropea għal Portal Diġitali Uniku tal-UE. Il-Portal se jkun jipprovdi informazzjoni centralizzata għal dawk li jridu jeżercitaw id-dritt ta’ mobilità fl-UE. L-access għal proċeduri importanti u li jintużaw l-aktar spiss se jkun online, sħiħ u non-diskriminatorju. Eżempji jinkludu applikazzjonijiet għal certifikati tat-twelid, reġistrazzjoni ta’ karozzi, il-Karta tas-Saħħa Ewropea, self għal studju u għotjiet u permessi għall-kummerc.

App għal Maltin barra minn Malta

Il-Gvern Malti għadu kemm vara app li twassal servizzi tal-Ministeru tal-Affarijiet Barranin lil Maltin imsiefra.

Malta Travel Point tagħti pariri dwar vjaġġar (inkluż prekawzjonijiet u informazzjoni fuq kundizzjonijiet politici u ta’ sigurtà), l-eqreb rappreżentazzjoni diplomatika Maltija u kuntatt fil-Ministeru fil-każ t’emerġenza. L-app tagħti wkoll informazzjoni dwar l-eqreb għasses tal-pulizija u sptarijiet.

Rapport tal-2017 dwar ic-Cittadinanza Ewropea

Il-Kummissjoni Ewropea għadha kemm ħarġet it-tielet rapport tagħha dwar ic-cittadinanza Ewropea (wara dawk tal-2010 u l-2013). Ir-rapport jieħu kont kemm ta’ konsultazzjoni pubblika kif ukoll tax-xogħol tal-Kummissjoni f’dan il-qasam bejn l-2013 u l-2016.

Rapport dwar Consul-on-the-move

Fil-Parlament il-Ministru George Vella ta rendikont dwar l-iżviluppi fil-programm Consul-on-the-move. Dan il-programm pilota li hu mifrux fuq sentejn sal-2018 jagħti servizzi konsolari (partikolarment il-ġbir ta’ data biometrika għall-passaporti) fejn hemm Maltin barra li ma joqgħodux qrib ambaxxata jew konsolat.

F’dil-fażi pilota s-servizz s’issa kien offrut f’San Francisco, Adelaide, it-Tażmanja, New Zealand, Vancouver u Edmonton.

Aġġornament (07/02/2017): Il-Ministru ta cifri aġġornati sat-30 ta’ Jannar meta, permezz tal-iskema nħarġu 96 passaport fl-Awstralja, 12 fi New Zealand, 19 fil-Kanada, 8 fir-Renju Unit u 23 fl-Istati Uniti.

Aġġornament (08/02/2017): Il-Ministru, fi tweġiba oħra, qal li għalissa Consul-on-the-move huwa proġett pilota u jiddependi minn jekk ikunx success jiġix estiż għal pajjiżi oħra.

Aġġornament (17/10/2017): Fil-Parlament ingħataw ic-cifri ta’ kemm ħarġu passaporti bis-saħħa ta’ dan il-proġett. Bejn l-1 ta’ Frar u l-25 ta’ Settembru 2017 inħarġu 117-il passaport: 96 fl-Awstralja, 14 fil-Kanada, 5 f’Michigan (l-Istati Uniti) u 4 f’Cardiff (ir-Renju Unit).

Servizz ta’ passaport għal Maltin ta’ Barra

Il-Ministru tal-Affarijiet Barranin għadu kemm ħabbar il-ħolqien tas-servizz mobbli Consul-on-the-move. Dan il-proġett għandu jiffacilita l-ġbir t’applikazzjonijiet għal passaport ta’ dawk il-Maltin ta’ barra li ma joqgħodux qrib t’ambaxxata jew konsolat Malti.

S’issa, minħabba li l-passaport Malti llum huwa biometriku, applikant kien ikollu jirrikorri personalment f’ambaxxata jew konsolat Malti.

Minbarra passaporti se jkunu qed jiġu offruti servizzi oħra normalment assocjati m’ambaxxata jew konsolat.

Il-programm pilota ta’ dan il-proġett se jkun jibda jitħaddem f’ħames ufficji konsolari: Toronto, Washington, Londra, Ruma u Melbourne. Is-servizz se jkun jirrikjedi ħlas addizzjonali ta’ €100.

Reazzjoni għal abbozz ta’ liġi dwar is-saħħa

Il-Parlament Malti se jibda jiddiskuti fit-tieni qari abbozz ta’ liġi dwar is-saħħa. Peress li l-abbozz jikkoncerna wkoll id-disponibbiltà tas-servizz tas-saħħa Malti għal persuni li ma jikkontribwixxux għas-sistema Maltija (fosthom Maltin ta’ barra) l-assocjazzjoni eżaminat it-test u ppreparat xi kummenti.

Progress fuq cittadinanza Ewropea effettiva 2011-13

Il-Kummissjoni Ewropea għadha kemm ħarġet rapport Dwar progress effettiv lejn Ċittadinanza tal-UE 2011-2013 li jkopri l-progress li sar mir-rapport precedenti tal-2010. Il-Kummissjoni għamlet ukoll tnax-il rakkomandazzjoni ġdida għal dan il-qasam għas-snin li ġejjin.

Konsultazzjoni tal-UE dwar il-kontijiet bankarji

Bħalissa hemm miftuħa konsultazzjoni tal-UE dwar kontijiet bankarji, partikolarment dwar it-trasparenza u l-komparabilità tat-tariffi ta’ kontijiet bankarji, bidla ta’ fornituri u access għal kont tal-pagament bażiku. Il-konsultazzjoni hija miftuħa sal-aħħar ta’ Ġunju.